அனைத்து நாடுகள் மாற்றுத்திறனாளிகள் நாள்: மாற்றுத்திறனாளிகள் நலத்துறை வெளியிட்ட முக்கிய அறிவிப்பு

    உலக மாற்றுத்திறனாளிகள் தினத்தை முன்னிட்டு நடத்தப்படவுள்ள மாநில அளவிலான விளையாட்டுப் போட்டிகள் மற்றும் கலை நிகழ்ச்சிகளுக்கான தேதிகள், நிர்வாகக் காரணங்களால் மாற்றி அமைக்கப்பட்டுள்ளன.

 

டிசம்பர் 3-ஆம் தேதி கடைப்பிடிக்கப்படும் உலக மாற்றுத்திறனாளிகள் தினத்தை ஒட்டி, மாநில அளவிலான விளையாட்டுப் போட்டிகள் நவம்பர் 19-ஆம் தேதியும், கலை நிகழ்ச்சிகள் நவம்பர் 20-ஆம் தேதியும் நடைபெறும் என்று ஏற்கெனவே அறிவிக்கப்பட்டிருந்தது. இதுதொடர்பான வழிகாட்டு நெறிமுறைகளும் கடந்த நவம்பர் 3-ஆம் தேதி வெளியிடப்பட்டது. தற்போது இந்த நிகழ்ச்சிகள் நவம்பர் 24, 25-ஆம் தேதிகளில் நடைபெறும் என மாற்றுத்திறனாளிகள் நல ஆணையர் எம். லக்ஷ்மி தெரிவித்துள்ளார்.

திருத்தப்பட்ட நிகழ்ச்சி விவரம்:

 

மாநில அளவிலான விளையாட்டுப் போட்டிகள்: நவம்பர் 24-ஆம் தேதி காலை 8.30 மணி முதல், பெரியமேடு ராஜா முத்தையா சாலையில் உள்ள நேரு உள்விளையாட்டரங்கத்தில் (பி மைதானம்) நடைபெறும்.

 

கலை நிகழ்ச்சிகளுக்கான தகுதிச் சுற்று தேர்வு: நவம்பர் 25-ஆம் தேதி 1காலை 10 மணி முதல் பகல் 1 மணி வரை, மாற்றுத்திறன் வகைக்கு ஏற்ப நான்கு இடங்களில் நடைபெறும்:

 

•  அறிவுசார் குறைபாடுடையோர் (ஸ்பாஸ்டிக் குழந்தைகள்): வேப்பேரி, ரித்தர்டன் சாலை (5-6) ஆப்பர்சூனிட்டி பள்ளி.
• கை, கால் பாதிக்கப்பட்டோர்: அடையாறு, துர்காபாய் தேஷ்முக் சாலை (எண் 10) ஆந்திர மகிளா சபா.
• செவித்திறன் பாதிக்கப்பட்டோர்: அடையாறு செயின்ட் லூயிஸ் காதுகேளாத மற்றும் பார்வையற்றோருக்கான பள்ளி.
• பார்வைத்திறன் பாதிக்கப்பட்டோர்: சென்னை கதீட்ரல் சாலை (எண் 127) சிறுமலர் பார்வையற்றோருக்கான பள்ளி.

மாநில விருதுகள் வழங்கும் விழா:

 

மாற்றுத்திறனாளிகளுக்குச் சிறப்பாகச் சேவை புரிந்த நபர்கள், நிறுவனங்களுக்கு மாநில விருதுகள் வழங்கும் விழா, ஏற்கெனவே திட்டமிட்டபடி டிசம்பர் 3-ஆம் தேதி நந்தம்பாக்கம் சென்னை வர்த்தக மையத்தில் (பழைய கட்டடம், அறை எண் 2 மற்றும் 3) நடைபெறும் என மாற்றுத்திறனாளிகள் நலத்துறையிடமிருந்து சுற்றறிக்கை அனுப்பப்பட்டுள்ளது.

***

உலக மாற்றுத்திறனாளிகள் நாள்: இந்த ஆண்டுக்கான கருப்பொருள் என்ன?

 

“The CRPD at 20: Building on Progress, Advancing the Future”

 

‘முன்னேற்றத்தைத் தொடர்வோம்; எதிர்காலத்தை முன் நகர்த்துவோம்.’

 

மாற்றுத்திறனாளிகளின் உரிமைகள் தொடர்பான ஐக்கிய நாடுகள் உடன்படிக்கை, உலகம் முழுவதும் மாற்றுத்திறனாளிகள் சம உரிமையுடனும் சம வாய்ப்புடனும் வாழ்வதை உறுதி செய்வதை நோக்கமாகக் கொண்ட முக்கியமான சர்வதேச மனித உரிமை உடன்படிக்கையாகும்.

 

இந்த உடன்படிக்கை உருவாக்கப்பட்டு 20 ஆண்டுகள் நிறைவடையும் நிலையில், கடந்த இரண்டு தசாப்தங்களில் மாற்றுத்திறனாளிகளின் உரிமைகள் சார்ந்து ஏற்பட்டுள்ள முன்னேற்றங்களைப் பார்வையிடுவதும், இன்னும் நீடிக்கும் தடைகளை அடையாளம் காண்பதும் இந்த ஆண்டின் முக்கிய நோக்கங்களில் ஒன்றாகும்.

 

கல்வி, வேலைவாய்ப்பு, சுகாதாரம், போக்குவரத்து, தகவல் தொடர்பு மற்றும் சமூகப் பங்கேற்பு உள்ளிட்ட துறைகளில் மாற்றுத்திறனாளிகளுக்கான வாய்ப்புகள் எந்த அளவுக்கு மேம்பட்டுள்ளன என்பதை உலக நாடுகள் மதிப்பீடு செய்ய வேண்டிய அவசியம் வலியுறுத்தப்படுகிறது. அதே நேரத்தில், சட்டங்களிலும் கொள்கைகளிலும் உரிமைகள் அங்கீகரிக்கப்படுவது மட்டும் போதாது; அவை மாற்றுத்திறனாளிகளின் அன்றாட வாழ்க்கையில் உண்மையான மாற்றத்தை ஏற்படுத்த வேண்டும் என்பதும் இந்த ஆண்டின் முக்கிய செய்தியாகும்.

 

பொதுக் கட்டடங்கள் மற்றும் போக்குவரத்து வசதிகள் மட்டுமின்றி, இணையதளங்கள், டிஜிட்டல் சேவைகள், தகவல்கள் மற்றும் தகவல் தொடர்பு முறைகள் அனைத்தும் அணுகக்கூடிய வகையில் அமைக்கப்பட வேண்டியதன் அவசியமும் வலியுறுத்தப்படுகிறது.

 

மாற்றுத்திறனாளிகளுக்கான கொள்கைகள் மற்றும் திட்டங்களை உருவாக்கும்போது, மாற்றுத்திறனாளிகளும் அவர்களது பிரதிநிதித்துவ அமைப்புகளும் நேரடியாகப் பங்கேற்க வேண்டும் என்பதும் முக்கிய இலக்காக உள்ளது.

 

“எங்களைப் பற்றி எதுவும், எங்கள் பங்கேற்பு இல்லாமல் இல்லை (Nothing about Us, without Us) ” என்ற அடிப்படைக் கருத்துக்கு ஏற்ப, முடிவெடுக்கும் அனைத்து நிலைகளிலும் மாற்றுத்திறனாளிகளின் குரலுக்கு இடமளிக்கப்பட வேண்டும் என்று வலியுறுத்தப்படுகிறது.

 

தரமான மற்றும் உள்ளடக்கிய கல்வி, சமமான வேலைவாய்ப்பு, சுகாதார சேவைகள் மற்றும் சமூகப் பாதுகாப்பு ஆகியவற்றை மாற்றுத்திறனாளிகள் சம உரிமையுடன் பெறுவதற்கான நடவடிக்கைகளை வலுப்படுத்துவதும் இந்த ஆண்டின் நோக்கங்களில் அடங்கும்.

 

பல நாடுகளில் மாற்றுத்திறனாளிகளின் உரிமைகள் சட்டரீதியாக அங்கீகரிக்கப்பட்டிருந்தாலும், அவை முழுமையாக நடைமுறைக்கு வராத நிலை இன்னும் காணப்படுகிறது. எனவே, உரிமைகள் தொடர்பான உறுதிமொழிகளை நடைமுறைச் செயல்களாக மாற்ற வேண்டிய தேவை இந்த ஆண்டின் அனைத்துலக மாற்றுத்திறனாளிகள் தினத்தின்போது மீண்டும் வலியுறுத்தப்படுகிறது.

 

எதிர்காலத்தை நோக்கிய அழைப்பு

 

2026 ஆம் ஆண்டின் அனைத்துலக மாற்றுத்திறனாளிகள் தினம், கடந்த 20 ஆண்டுகளில் அடைந்த முன்னேற்றங்களைக் கொண்டாடுவதற்கான நாளாக மட்டுமல்லாமல், இன்னும் அகற்றப்பட வேண்டிய தடைகளை நினைவூட்டும் நாளாகவும் அமைகிறது.

மாற்றுத்திறனாளிகளின் உரிமைகள் சட்டப் புத்தகங்களிலும் கொள்கை ஆவணங்களிலும் மட்டும் இடம்பெறாமல், அவர்களின் அன்றாட வாழ்க்கையில் உண்மையாக அனுபவிக்கக்கூடிய உரிமைகளாக மாற வேண்டும் என்பதே இந்த ஆண்டின் மையச் செய்தியாகும்.

 

அடைந்த முன்னேற்றங்களை அடிப்படையாகக் கொண்டு, அனைவரையும் உள்ளடக்கிய சமமான எதிர்காலத்தை உருவாக்குவதற்கான நடவடிக்கைகளை மேற்கொள்ள வேண்டும் என்பதே 2026 ஆம் ஆண்டின் அனைத்து நாடுகள்  மாற்றுத்திறனாளிகள் தினம் உலக நாடுகளுக்கு விடுக்கும் முக்கிய அழைப்பாகும்.

www.thodugai.in